I familija isila inportantno rola ando čhavorikano barjaripe. Ko kher kerena pe o siklipena thaj o pačipe. I oštato objava e serijaleski „Dživdipe bizo phandlipe” anela o iskustvo e Ivana Aleksićako. Oj si daj e sikljovnengiri tari Fundavni škola „Jovan Jovanović Zmaj” ki Vranja.
O vakeribe si vaš i atencija, o pravilija thaj o phikaripe. E čhavorese trubula dad-daj kova si othe thaj kova mangela te šunel. O sadivesko vakeribe šaj te kerel polokho te pendžarelpe o pharipe ki vrjama.
O terne na vakerena uvek phravde taro okova so kerela lenge pharipe. Šaj te daran tari kazna numaj so o dada-daja ka oven razočarime. Odoleske o vakeribe na trubula te ovel numa vaš note thaj obaveze. Inportantno si te pučelpe o čhavoro sar nakhavdža o dive. Trubula te mothavelpe interesibe vaš leskere odnosi thaj emocije. Disavo drom trubula vrjama thaj adjikeripe. O dad thaj i daj trubula te šunen e čhavore bizo te čhinaven leskoro lafi. Rahato reakcija dela pobaro šaipe o čhavoro aver drom korkoro te rodel vakeribe.
O telefoni thaj o interneti si kotor e sadiveskere dživdipasko. O familijakere pravilija trubula te oven jasna thaj haljovde. Šaj te oven haljabe bizo telefoni thaj sovibe bizo obaveštenja. Inportantno si o bare manuša pere mothavibaja te ikeren o dogovori. Te o dad-daj stalno dikhela ando ekrani, o čhavoro na haljola so o dad-daj mangela lestar. I khethani vrjama rodela atencija, na numa bešipe andi jek livni. O phiribe, o vakeribe numaj o khelipe e familijaja šaj te zorjaren o pašipe.
Trubula phravde te vakerelpe taro love thaj taro reklame vaš kladibe. O čhavoro trubula te haljol so o lafi vaš dobitak na cidela o riziko te našavelpe. Inportantno si te mothavelpe i vrednost e butjaki thaj te planirinenpe o troškovi. O vakeribe taro alkoholi thaj tari droga trubula te ovel vaš e čhavoreskere berša. O dad-daj trubula jasno te phenel so o čhavoro šaj te na lel i rizično ponuda. O čhavoro na trubula te kerel bilačhipe numa te šaj ovel akceptirimo taro amala.
O pačipe ando peste barjola taro sadivesko odnosi. Inportantno si te delpe lačho lafi vaš o trudi. E čhavorese trubula te mukelpe te phenel poro godipe. Trubula te sikavelpe te čhivel granice. Kana avela i presija taro vršnjaci, trubula te džanel kaste šaj te vakerel. O dad-daj thaj o čhavoro šaj angleder te keren dogovori vaš o vikinibe phikaribasko kana irinela pe taro ikljovibe. O sastipe thaj i sigurnost tegani si anglune. Taro pravilija thaj posledice šaj te vakerelpe kana o neposredno pharipe nakhela.
Te o khelipe numaj o netvorkija ciden o sikljovibe, o haljabe thaj o sovibe, trubula te reagirinelpe. O angluno hapi si vakeribe taro averčhanipa. Lačhe si te kerelpe dogovori vaš i vrjama e uređajengi thaj vaš aktivitetija bizo ekrani. O averčhanipa polokhe dikhenape kana o bare manuša ikerena o dogovori. Te o pharipe ponoduri ačhola, trubula te rodelpe saveti taro psihologi numaj doktori. Numa o numero e sahatengo uzalo telefoni nane dosta vaš i dijagnoza. Inportantno si te dikhelpe sar o siklipena kerena influenca ando čhavorikano dživdipe.
O dada-daja thaj o sikavne šaj te dikhen averčhane buča. O čhavoro na mothavela pe uvek jekhutno ko kher thaj andi škola. Odoleske o informacije trubula rahato te ulavenpe. I resin si te haljovelpe so trubula e čhavorese. O školakoro psihologi numaj pedagogi šaj te del piko ando akava vakeribe. O familije taro Vranjakoro than trubula te oven zorjarde te roden phikaripe ki vrjama. O čhavorikano pharipe nane sebepi i familija javno te osudinelpe. Inportantno si te phandavelpe e lačhe phikaribaja.
O kamipe značini te akceptirine e čhavore thaj te čhive jasna granice. O phikaripe na značini te odobrinelpe o bilačho mothavipe. O dad-daj šaj te mothavel briga thaj ko jekh vakti te rodel sigurnost thaj stručno saveti. I dar taro godipe e trujalimasko na trubula te adjikerel o pregledi. O vakeribe e stručnjakeja šaj te del piko hem e dade-dajake kova na džanela so te kerel. Na trubula i familija korkori te legarel sa o pharipe. O phikaripe tari škola thaj taro sastipaskere službe šaj te ovel inportantno.
O dad-daj na trubula te džanel o odgovori ko sakova pučipe. Inportantno si te phenel kana trubula leske saveti. Šaj khethane e čhavoreja te rodel čačutni informacija. Akaleja mothavela so o pharipa agorkerenape e vakeribaja thaj e odgovorne postupkencar. O stručnjako šaj te ovel kotor akale familijakere dogovoresko.
I buti e dadeski thaj e dajaki si te barjaren odnosi kote o čhavoro džanela so šaj panda te vakerel. Akava si hem kana isi svađa numaj kana o čhavoro na ikerela o dogovori. O pačipe irinela pe e postupkencar thaj e ikeribaja e dogovoresko. O čhavoro trubula te džanel so si kamlo thaj so šaj te rodel phikaripe. O familijakoro pašipe, o odgovorne granice thaj o butikeribe e stručnjakencar dena piko leskere arakhibaske. Adžahar kerdžola o fundavno than vaš posigurno barjaripe thaj vaš posaste alusariba.
Sa o tekstija e serijaleskere „DJIVIPE BIZO MARDNIPE“ arakhen akate.
Bišundo vastengo phandlipe e terne manušesko andi avdisutni vrjama
Narkomanija: O čačipe palo hemijaki iluzija
Komari: Džekpot kova čorela o ternipe
O akoholizmi: Kana o tahtaj dirigirinela e ternipaja
O alarmesko signali ando školakoro zvono
O dad thaj i daj andi vrjama e digitalnikane zamkengi
I psihologija e ikljovibaski taro adhinipen
I Vranja bizo phandlipe e adhinipasko
Projekat podržao Grad Vranje. Stavovi izneti u podržanom medijskom projektu nužno ne izražavaju stavove organa koji je dodelio sredstva.