Dživdinaja ko vakti kote si o asajbe, pharipe, opsesija thaj aver, te vakera sar ked na dikhaja len. Phiridoj andor amare dizija, dikhaja pejzažija kote agresivikane thabljona o neonska sijalice kotar sportikane kladionice, numa dominirinena hem o aplikacije ando amare džande telefonija. Ola o hazardibe promovirinena sar jek manglo hem moderno dživdipe.
O terne manuša astarde naturalikane kamipaja te mothavenpe, thaj ki sig te aven dži ko love, ola godinena so šaj te kontrolirinen i situacija. Našti te aven ki godi so akava hobi si garavdi forma so sijan adhinimo (zavisno) andi modernikani vrjama, so kerela pli buti bišundo, bidikhimo, kerela atako upral i godi ando neurologikano jezgro. O komari šaj te ulava taro hemijakere supstance, soske o komari na ačhavela taro jek drom dikhutne pharipa.
Ando komari kana lena love, ando manuš kerdjola o dopamini, numa kana našalena kerdjola neurotikano hem zoralo kamipete „ikale tut“, kote phandljola o psihologikano godipe kote o hazardiribe čhinavi te ovel khelipe, ov ovela zoralo kamipe kova si telal o manušikano haljovibe.
Te šaj polokhe te haljova o horipe akale bučako, trubula te dikhelpe so mothavi i statistika. I angluni paramis ka mothavel i anatomija naštimaski (neuspeha) thaj e pharipaski kote ignorisindžape o adhinipen (zavisnost) ko dešefta beršengo F.A. kova ando drom e komarlukosko khuvdja dikhindoj e sporteskere mečija ple amalencar. O angluno drom kheldža ko šel dinarija, thaj odova dive ljelja opsesivikane te dikhel o kvote.
Palo odova dolindža te hovavel te rodel love taro manuša hem te čorel o kherutne love. O kherutne halile so diso nane šukar, numa godindže – „ternikano dilinipe“, numaj ko agor akija buti andža te ruminelpe e familijako kethanipe hem ov čhinavdža te džal ki škola. Dujto paramis mothavela lačho reagiribe kote andi vrjama avela i reakcija e trujalimaski (zajednice) ko egzampli e gimnazijalcosko o L.J. kova dikhindoj sahatencar ljelja te čhivel (ulaže) o love ando anavkerdo khelipe „kutija sa iznenadjenjem“ ando video-khelipe, so si psihologikano ekvivalenti e klasikane komaresko.
Oleskoro sikavno haljilo so na avela ki škola thaj so mothavi anksioziteti andi škola. Vikindžale te kerel lafi leja, kote alo hem o psihologo e školako. Ola didžele phikaripe te haljol o psihologikane mehanizmija e manipulacijakere ando digitalnikano than. Palo odovačhivdže le te sikljol te programirini thaj ando sporti. Akaleja o pharipe taro adhinipen čhinavdjape, angleder numa te kerel pobaro bilačhipe.
Trito egzampli mothavela bibahtali paramis kote o bišupandžengoro M.K. kova ple berša nakhavdža ko patologikano komari, našavdža i buti hem e amalen. Pali nakhli vrjama korkoro alo thaj rodindža phikaribe taro specijalizirime institucije, kote vakerdža so trubula leske piko. Othe kerdže leske psihoterapije, thaj pali jekh vrjama resadža te nakhavel o bilačhipe thaj te ovel stabilnikani persona, kova avdije phikarela (pomaže) averen.
Analizirindoj akala egzamplija, šaj te haljovelpe o paripe maškar duj riga. Оđživdipe andi angalji adhinipaski taro komarluko si dživdipe ando bičhinavdo phandlipe ando hovavno šaipe. Đji kaj o manuš kova nane phandlo komarlukoja,isile phravdo drom te kerel buti, te sikljovel, te ovel džando, kote korkori isile šaipe te alusarel piro drom. Ando akava drom i familija isila šeruni influenca ando kher, kote trubula jek jekhe te ikeren, hem lafencar te anen decizije taro love thaj avera buća.
A i škola isila buti te barjarel kritikano godipe taro digitalnikano džandipe, te sikavel e ternen te haljon o manipulacije thaj o reklame. O phandlipe e edukacijengere institucijengo, sastipaskere institucijako hem medijesko, on kerena baro protetikano (zaštini) duvari kote o komardžija našali pli hovavni idejologija. Majbaro džekpot kova jek manuš šaj te dolel ando poro dživdipe si te arakhel poro dživdipe, te ovel rahati thaj te ovel les poro muklipe te šaj korkoro te kreirinel poro futuripe (budućnost).
Kotar pendžaripe e rizikengo dži ko rodipe phikaribasko — dikhen o serijali „DJIVIPE BIZO MARDNIPE“, kova šaj te drabaren akate.
Bišundo vastengo phandlipe e terne manušesko andi avdisutni vrjama
Narkomanija: O čačipe palo hemijaki iluzija
Komari: Džekpot kova čorela o ternipe
O akoholizmi: Kana o tahtaj dirigirinela e ternipaja
O alarmesko signali ando školakoro zvono
O dad thaj i daj andi vrjama e digitalnikane zamkengi
I psihologija e ikljovibaski taro adhinipen
I Vranja bizo phandlipe e adhinipasko
Projekat podržao Grad Vranje. Stavovi izneti u podržanom medijskom projektu nužno ne izražavaju stavove organa koji je dodelio sredstva.