Kana godinasa taro lafi „sukcesi“, butenge amendar andi godi avela manuš kova isi le sa pandjengere ja nesavi diploma ando vast. Numa dikhindoj tari rig sar manuš, kova nakhlja esavko školako sistemi, djanaja so o sukcesi isile but muja. Numa o note si šerune, kote mothavela e sikljovnesko angažuibe thaj leski zor. Šaj te vakera so akate isi pana buča kote o note našti te mothaven sa. Sar dikhaja o entuzijazmo e sikljovnesko kana mangela te pučel diso, so interesini ole? Ja te vakera lesko zoralipe kana pučela so na haljola thaj rodela sopošukar te mothaven lese.
Numa rodela te vakerel poro godipe, a odija dujto rig te šunel thaj te haljol? Avdije djivdinaja ando them kova si sigutno, thaj amendar rodelape te djana, te haljova, te ovel amen maškarbutikeribe thaj inoviribe ki buti. O sukcesi nane serija taro pandjengere ando dnevniko, numa hem te akhara o pharipe koleste avaja ando amaro baripe sar manuša. Akava sa vakeri, kana godinaja taro školako sukcesi, trubula te djana kaj si odova sar jekh mozaiko djandipasko, mothavibasko, dikhibasko, numa hem emocijako, kova kerela e sikljovne ando lesko drom.
O problemija e sukcesesere ando školako sikljovibe
Kana daja amen godi amare školakere divengo, šaj dijek amendarte delpe godi taro nesavo predmeti, numa tema koja dindja amen pharipe, ja te vakera sar ked amari zor na dindja „rezultatija“. Numa kana dijek amendar ladjala taro nesavo momenti, kamela te haljova so o problemija ando e školako sikljovibe nane ulavde sar pharipe, numa odova si drom kova sa dijek čhavoro nakhela. Nesave marenape e matematikaja, aver čhavore te sikljon dijekh čhib so ali taro svemir, isi hem socijalnikane pharipa, adjikeribe tutar te ove diso, te oven tut šukar note.
O manuša but droma kerena pharipe upral o „akademikane čerenja“, okolendar so mothavena but šukar rezultatija. Numaj akava soj vakerdo mothavi lji so aver djene si pohari bučarne numa isi len potikno šaipe? Haljolapes kaj na. Sakova drom kana o sikljovno avena dji ko problemi, olenge phravdjola šajipe te barjaren poro djandipe hem te agorkereno problemi, pere zoralipaja thaj djandipaja. Odoleske trubula andi škola o pharipe te dikha sar šaipe te nakhava ole ando amaro barjovipe. Soske ando agor e divesko, majšeruno si okova so sikljiljam, a nane ramome ando pustika.
I inportanca e školakere aresibasko
Dena lji tumen godi kana o angluno drom arestinen diso baro andi škola? Šaj odova sine tumenge ašaripetari rig e sikavneski, numa aresipe ando diso aver. Odola tikne viktorije, amenge sine len bari inportanca ando amaro djivdipe. Ando amaro školako reslipe, na kerelape lafi, numa taro amaro baripe ja ašaripe, numa kerelape lafi hem taro rezultatija amare bučako, so aljam dji ko anglunipe. Akava si amange godjake te djana kana avasa ko disavo pharipe, so šaj te nakhava ole te dijam amari zor.
Trubula te haljova so andi škola amaro reslipe nane numa o note hem o diplome. Akate si te haljove i omaterijali, te ovel tut kritikano godipe, thaj te ovel tut djandipe te nakhave o problemija ko kreativikano modeli, hem dji kaj fokusirinaja amen ando bare resina, numa trubula te damen godi hem ko tikne resina. Soske e sikljovnese kova sine les problemi disave temaja, olakoro haljovibe šaj te ovel amenge sar kana astardjam angluno than. Ko agor trubula te djana so i resin nane samo premija, voj si hem lekcija so sikljovaja te nakhava ola, ando amari zor.
E školako haljovibe taro resipe e sikljovnengo
Kozom droma šundjam akava lafi, thaj kozom droma pučljam amen: „So mothavi o resipe?“ But amendar ka godinen kaj si odova o note thaj o diplome. Ando keripe lafi e sikavnencar, dadencar thaj e sikljovnencar ka haljova kaj si o lafi taro pobaro kompleksikano problemi. Soj okole sikljovnencar so mangena te djanen, te pučena te haljoven, so angažirinenape ando diskusije, numa oleskere note nane sar so trubula? Ja čhiven andi godi dijekhe sikljovne so sakova dive dela pestar sa te sikljol, thaj na čhinavela odolestar. Odolese trubula te dikha polačhe akale bučate, odoleja so olengiri zor trubula te lelpe sar modeli, kote sakone sikljovne šaj te dikha sar šukar ando nesavo dikhipe.
O faktorija kolendar avela i resin e sikljovnengi
Kana sakova drom pučasa amen, sose disave sikljovne isi len lačhe rezultatija ki škola, a aver djena dena bari zor, akate šaj te vakera so nane amen lokho godipe. Dujekh olendar isi lenge naturalikane, dendo te haljoven lokhe, numa akate isi bari paramis, soj phari haljovibase. Djanaja so i resin nane numaj talenti, othe isi panda phandle buča kola sa kedenape. Akate o kherutne isilen šeruni rola. O čhavore kola isi len zuraribe thaj haljovibe taro kherutne, isi len pobari motivacija te sikljon. Lengoro zuraribe barjola kana djanena so isi kastete pačan thaj te roden žutipe thaj haljovibe.
Numa othe perela hem i rola e sikavneski. Ola inspirišinena, motivišinena hem butfar pendjarena e talentikane sikljovnen, kote hem o čhavore korkori nadjanena. Akate na trubula te bistra hem e sikljovnen, lengoro zoraribe te resenpe e pharipnjaja. Ko akava sa perena hem o amala e sikljovnesere, sose hem ola isi len influenca upral leskoro sikljovibe. Ano agor šaj te vakeripe so sakova čhavoro si paramiz pese, numa sakova čhavoro isi les šaipe thaj potencijali te resel diso, te sine ole čačuno zuraribe, inspiracija thaj kamipe te sikljol.
Pedagogikani-instruktivikani buti e sikljovnencar thaj o godipe e dadengothaj dajengo
E pedagogikani-instruktivikani buti e sikljovnencar nane numa metodikano dikhibe ando sikljovibe, odova si hem edukuibasko-sikljovibasko dikhibe. Kana o sikavno ulavi piri vrjama vaš individualnikano thaj grupako vakeribe e sikljovnencar, ov othe na numa so pendjarela lengere akademikane trubuimata, olaothe avena hem dji ko emocionalnikano phandlipe. Ov dikhindo sakone sikljovne, ov olenge ločhakerela i metoda sikljovibaski te ovel šukar thaj haljovde sarinenge.
I influenca akale proceseski nane numa ko sikavno, othe si phandle hem o dada daja, kote vakerena thaj ulavena poro godipe, kote avelape dji ko jek haljovibe taro čhavoro, leskere mangimata, talentija thaj aver. Esavko keriba buti ando sikljovibe, nane ano pučipe numa o sikljovibe, akate avela dji ko kethanutno zoraribe kote sa dijekh čhavoro šaj te del poro maksimumi. Ando esavko dikhibe thaj haljovibe, sa e sikljovnengoro drom ka ovel polokho thaj kerduno.
Konsiloski buti e sikljovnengere dadencar dajencar, kola ikljovena taro sikljovibe, thaj dejba lenge zoraribe
O sikavne beršencar resenape pučibaja sar te den žutipe e čhavorenge taro senzitivikane grupe, kola ikljona taro sikljovibe, vaš sezonikane buća. O kherutne e sikljovnesere, vakerena so akija buti olenge trubula, te šaj nakhaven thaj keren poro djivdipe. Numa sakova ikljovibe tari škola e sikljovnese si inportnantno vrjama so ov našali. Odolese si šeruno te ovel len direktno thaj čačutno haljovibe maškar o kherutne thaj o sikavno. Ando esavki buti trubula te arakhelpe ikljovibe taro problemi.
Šaj lji e čavorese te sniminelpe o materijali, numa te delpe dopherdo materijali? O dopherdo sikljovibe so organizuinela i škola mothavdjape sar but šukar okolenge so na sine nesavi vrjama andi škola. Akate trubula o sikavne palo redovnikano sikljovibe, akale čhavorencar te kerelpe buti te resen o našavdo sikljovibe. Majinportantno buti si te kerelpe trujalipe kote sakova čhavoro ka haljolpe šukar, numa so reselape avere problemencar avrijal tari škola.
Kana godinaja taro sikljovibe, butfar godinaja tari klasa e sikljovnengiri thaj e pustika. Numa ando maškar e sikljovibasko si o čhavoro, a oleskere resina avena kana isi butikeribe maškar o kherutno-edukuibasko rotalimo thaj o formalnikano sikljovibe. O dada daja, sar inportantna, ola astarena angluno than ko djivdipe e čhavoresko. Ola hor haljovena olesere šaipena, o afinitetija ja okova so našti te kerel. Tari dujto rig i škola pere pedagogikane manušencar, dena strukturikano šaipe te avel dji ko akademikano barjaribe e čhavoresko.
O phandlipe maškar o dada daja, thaj e školako ambijenti na avela spontanikane. Ov ovela andi kontinuime komunikacija, ando haljovibe thaj maškar lengoro butikeribe. O sikavne lena o informacije taro dada daja, thaj odoleja kreirinena lačho šaipe sakone čhavorese te nakhavel o pharipe. Kana e šukar khereski energija phandelapes e siklanaja, tegani avela i magija koja so dikhaja. Ando esavko rotalimo, o djandipe avela sar fundamenti te barjol o manuš.
Sa o tekstija kotar serijali ,,E SIKLJOVNENGORO ČHORDARIPE“ akalestar šaj te drabaren ko avera linkija.
Soske si inportantno te čhinavelpe o ikljovibe e romane sikljovnengo taro sistemi školuibasko?
O mehanizmija andi škola so čhinavena o ikljovibe sikljovibasko
I angluni identifikacija thaj o butikeribe vaš te čhinavelpe o ikljovibe e sikljovnengo
O individualnikano plani e prevencijajo taro ikljovibe e sikljovnengo
Ikljovibe e sikljovnengo: E aktivitetija ando nivelo e školako
Butikeribe e dadeja dija hem e školaja, sar prevencija e sikljovnengi taro ikljovibe
I rola e komunaki andi prevencija e čhavorikane ikljovibasko tari škola
I rola e pedagogikane asistentoski andi škola, thaj o zuraribe andi prevencija e sikljovnenge
O dada hem e daja avdije resenape butederprovokacijencar
Propozi e školakere Akcione planesko vaš i prevencija ikljovibasko e sikljovnengo
I influenca e edukatorengi ando čhavorengo sikljovibevaš lengoro anglunodjajbe andi škola
O problemi e čhavorikane ikljovibasko tari škola, tari rig e sikavneski
Sukceseskere faktorija ko sikljovne
I inkluzija thaj i prevencija ando edukuibe e romane populacijako
Foto: Ministarstvo informisanja i telekomunikacija