O edukuimo stili e dadengo dijengo si but interesantno taj rodela te istražinelpe thaj isile bari rola te tiknjarelpe o bilačhipe taro avgoikljovibe e školako. Edukuibaja kotar tiknipe, o dada dija dena pere čhavese fundavne norme, thaj ole sikaven okova so godinena kaj si šukar. Taro edukuimo stili e dadengo dijengo adjikeripe save manuša ka oven olengere čhave kana ka barjon, numa šaj te avel hem dji ko bilačhipe. Tej o dada hem dija insistirinena andoe čhavengo kandipe ko lengoro edukuibe.
I funkcija e dajaki e dadeski astarela poro autoriteti hem kerela po than ando manušikano sistemi, thaj odoleja mothavela piri rola andi familija. Ando akava fundavno dikhibe si kerdi e familijakiri funkcija, kote palo istorijako vakti alope hari dji ko aver dikhibe e familjijake funkcijako. Angleder e familijake sine majinportantno i ekonomikani rig, ja te vakera produkcijaki funkcija, numa avdije si odova majinportantno edukuibaski funkcija e familijaki. Avdije i kherutni familjija, te šaj te kerel piri edukuibaskiri funkcija, trubula te nakhavi bare pharipa, kola si lendar andi tranzicija, thaj traumatikane eksperijence. O fundavno funkcionišibe e familjijako, ikerela e familija kethane.
Sako jekh amendar šundja i fraza „na sikavdjama adjahar meri daj hem o dad“. Čače si so o dada hem daja isilen poro drom educiribasko ple čhavorengo, numa sakoja generacija godinela kaj si voj majšukar ando poro edukuibe, numa palo dekadako studiribe, pendjarde si fundavne „šablonija“ e dadengere hem dijengere. Isi amen okola dada dija, kola mangena haljovibe, discipliniribe thaj hačarde norme. Olengo kher si sar militarimo kampi – sa si ando kher, si ano poro than thaj khanči na tolerisinpe te na kandelpe. Tari dujto rig, isi amen dada dija, kola si sar amala pere čhavorenge, kote si lenge sa muklo thaj sa si muklo andi diskusija.
Maškar akala duj ekstremija, isi te vakera hem jek maškar – dada dija, kola kombinirinena o čačutno haljovibe thaj mangibe kote djanelape so adjikerelape lendar. Numa bibahtake isi amen hem okola dada dija, te na bistralen, so kotar but motivija bistrena piri rola, kote mukena e čhavoren, korkore so mangen te keren, kote palo akava o vakerdo, avela dji esavki buti te ikljon taro sikljovibe. Kana godinaja kotar sa akala stilija, inportantno si te haljova so nane „jekh karakteristika so ka ovel savorenge“. Sakova čhavoro si jekhutno sar personi, sar hem o dada dija. O haljovibe akale stilengo dela žutipe pošukar te komunicirinipe, thaj te barjarjaripe hem zurjarjarelpeolengo čhavoripe.
Autoritarnikano edukuibasko stili. Kon amendar na šundja o pendjardo lafi „odoleske sose me vakerdjum adjahar!“? Kana godinaja taro autoritarnikano stili, akala si o anglune lafija kola perena amenge ani godi. Kerelape lafi taro dada dija, kola sa ikerena ando pe vasta, thaj mangena olengoro lafi te kandelpe bizo but te pučelpe. O čačipe si so ando esavko modeli edukuibaskonane but than vaš o dijalogo thaj e čhavorengoro muklipe. But taro dada dija, kola lena esavko edukuibasko modeli godinena kaj kerena majšukar pere čhavenge. Ando esavko godibe mangena te arakhen pere čhavoren taro bilačhipe so šaj te astarel len. Numa trubula te godininelpe hem taro balansi. E čhavorenge trubula muklipe, haljovibe thaj šaipe te mothaven poro godipe. Soske o modeli edukuibasko kova mukela mangipe, haljovibe, phravdi komunikacija maškar o dada dija hem o čhavore, si majšeruni buti te astarelpe pačipe thaj haljovibe maškar lende.
Liberalnikano edukuibasko stili. But droma arakhaja amen e dadencar dijencar kola lena liberalikano edukubasko stili. Akala si dada dija, kola mukena o čhavoren korkore te anen pere decizije, kote delape lenge muklipe korkore te haljoven o them kote so barjona. Lengiri filozofija si so si majšukar korkore te sikljon ando piri eksperijenca. Esavko dikhibe sile poro lačhipa. O čhavore kola si edukuime ando esavko modeli silen zoralipe te keren pere inicijative thaj na trubula lenge nisavo žutipe. Uzo odova o dada hem o dija, e čhavencar silen hor haljovibe kova si bazirimo ando pačipe. Numa sar sa o stilija, hem o liberalnikano stili igarela poroprovociribe. Po dijek drom o čhavore šaj te haljoven so nanelen drom sar te keren, thaj trubula lenge mothavipe. O inportantnibe si o balansiribe: „Te delpe e čhavenge muklipe, numa hem te mothavelpe lenge o drom, te šaj polokhe te haljoven o djivdipe.“
Demokratikano edukuibasko stili. Arakhaja amen hem dadencar dijencar, so lele demokratikano modeli edukuibasko. Godinipe so ando kherutno bešipe, sarine lendar silen poro avazi, pa hem o najtikneder čhavoro. Akava si o šerunipe akale demokratikane edukuibaskere stiloski. Akate o dada dija, kana vakerena diso, ola hem šunena so lengere čhavore godinena hem so rodena. Anen tumenge ani godi so i daj vakerela ple čhavorese „So godineja, kozom vrjama trubula tuke vaš o videokhelipe?“ numa te vakerel lese, so te kerel. Ando esavko dikhibe o čhavore sikljona so olengoro godipe sile piri rola, thaj rodela te šunelpe hem olesoro lafi. Numa akava nane lokho. Podijekh drom pharo si te arakhelpe maškaruno drom, ando okova so rodena o čhavore hem okova so vakerena o dada dija thaj so godinena kaj si majšukar. O Inportantnibe si ando vakeribe, haljovibe koteka arakhelpedrom sarinenge te ovel šukar.
O jekhipe ando preferiribe ando edukuibaskere stilija e dadeskere hem e dijakere. Kana o istraživačija arakhenape e familija, haljovena so si inportantno buti kaj o stilija e dadeskere hem e dijakere si jekhutne. Godinen kaj si odova sar khelipe: „Tej o dad hem i daj kheldje jekhutni khelin, sa ka ovel polokhe.“ Podijekh drom isi maškar o dad hem i daj nane haljovibe, isilen aver dikhibe ando edukuibe. Jek lendar preferirinela te kandelpe lesko lafi, numa i dujto rig mukela phravdipe ano haljovibe. So numa hem odova šaj te ovel šukar. O inportantnibe si te na ovel ko sa jek rodipe, numa trubula komunikacija hem haljovibe maškar o partnerija. Kana o dad hem i daj kerena lafi hem isi haljovibe maškar lende, odova o čhavore dikhena. Von si manuša kola si timeskere khelutne, kote isi kompromisija hem isilen respekti maškar peste. A akava si jek taro majlačhe buča, kote o čhavore sikljona ando po kher.
Andi familija si vrjama kana isi pharipe, thaj modeli sar šaj te nakhavenpe. O familije kola šaj te amortizirinen o pharipe, numa te arakhen konstruktivikanoresipe hem te nakhaven o problemi, othe isi šaipe te kerelpe nevo kvalitetikano familijako djivdipe thaj adaptacija ando nevo trujalipe. Vaš lačho barjaribe e čhavorengo i familija oleski trubula te ovel la socijalnikano, ekonomikano, kulturikano thaj emocionalnikano statusi.
But istaražuibe mothavde kaj si demokratikano statusi majlačho te barjarenpe o čhavore. O dada dija, si interesime te ovel len lačho haljovibe pe čhavorencar, thaj maškar lende te ovel emocionalnikano mothavdipe. Godinipe kaj amende ando amare familije isi tikno stili godipasko, odoleski si lačhe akala tematar so pobuter te vakerelpe ando medijumija thaj ando e čhavorikane khera. Djanaja so kotar jek drom našti te kera idejalnikanešanse, te ana uče sukcesija e sikljovnenge andi škola, numa o butikeribe ando anglunipe šaj te kerelpe, te kerdjape jekh palo jekh buti. Ando phandlipe akale problemeja, vaš te anenpe polačhe rezultatija o familije e ćhavorengere trubula te oven ando demokratikano stili edukuibasko.
Andar e školakosukcesesko aspekti o šaipe ikljovibasko tari škola, šaj te dikhelpe ando e familijako zoralipe, so ando pharipe arakhena zoralipe te resen thaj e čhavore te ovel les šukar note ki škola. O patrijahalnikane familije kola nanelen haljovibe premal pere čhave trubula te djan te edukuinenpe. Godinaja so o edukuibe e dadengo dijengo, ka anel polačho haljovibe maškar olende. Kana o dada dija, ka haljoven o „problemi“, so silen andi familjija, tegani ka ovel dominantno o demokratikano stili edukuibasko. Godinaja so o demokratikano edukuibasko stili ka anel polačho barjaribe ando kher, kote nane te oven len traume, ando lengoro pačipe kote ka mothavenpe o polačhe rezulatatija.
