I škola trubul te ovel angažuimi panda pobuter ando meres e prevencijengo thaj intervencijengo, na numa ko sikljovne kola si ando pharipe te ikljon tari škola, numa trubul sa e sikljovnencar soj andi škola. Te kerdjape buti kontinuirime thaj lačhe, o kerdune meres thaj o aktivitetija ka oven pozitivikane, thaj ka ovel len influenca ando sa o sikljovne ki škola, a na numa ko sikljovne kola si ando pharipe te ikljoven taro sikljovibe. O šerune elementija e aktivijengo ando sa o niveli e školako šaj te oven: te phandavenpe o dada dija, inkeribe e školake amalengo thaj dopherdo klasako sikljovipe.
Andi inplementacija e aktivijengo te phandavenpe e daja dada, te arakhelpe kišlipen vaš e amalengo ičeripen thaj te lačharelpe o dopherdo klasosko sikljovibe vaš e sikljovnengo trubuipe, dikhelape ano odova so i škola mangela te ovel la lačho butikeribe sa e relevantnone akterencar, čhivindo len ando sadivengoro djivdipe e školako. Ando esavko butikeribe i škola barjarela poro etos, a odoleja hem sarine haljovenape šukar – sar o sikavne, o sikljovne thaj lengere dada dija. O aktivitetija ando niveli e školako trubula te godinenpe thaj te planirinenpe adjahar so ko sikljovne ka anel pozitivikanothaj motivirimo dikhibe. O rezultatija akale aktivijengo šaj te barjaren e sikljovnesko kamipe ko sikljovibe, te anel leske nevi percepcija kotar lesko šaipe ando anglunipe thaj pobaro sukcesi e notengo.
Šaj anel leske te ramonelpe ko pobare škole, te ovel proaktivikane ando sikljovibe, hem ple amalencar thaj e sikavnecar. Lačho organizuibe thaj kerdipe o aktivitetija ano niveli e školako šaj kerel pozitivikani influenca ando sikljovne, adjahar so adekvatnone institucionalnone butikeribaja tiknjarena o šaipe taro ikljovibe e školako. Sar ko nesave phare momentija kana šaj te nakhel ki maškaruni škola ja diso aver te ramonelpe. Ando esavke problemija i škola korkori anela dicizija, save aktivitetija te kerel.
Butikeribe e daja thaj dadeja. Butikeribaja thajphandavipaja e dadeja dija, ando djivdipe e školako barjarelape o djandipe olengoro tari influenca e sikljovibasko. O istražuibe mothavdja kana si o sikljovno ando pharipe te ikljol, o dad i daj silen bari rola, o sikljovno te ačhol andi škola. O dad i daj butfar stegime pere pharipnjaja thaj egzistencijaja te anen khere pere čhavorenge, ola nanelen vrjama hem na haljovena i influenca e sikljovibaski vaš anglunipe pere čhavengoro. I eksperienca istražuibaski ando Pčinjakoro rotalimo ando škole mothavdja, kaj o dada dija, sa dajek drom ale ando školakere aktivitetija kana olengere čhavore vakerdje te aven. Sar egzampli te vakera, si kana kerenape edukacije e dadenge dijenge, informiribe e dadengo dijengo, pandinipe e dadengo dijengo ando saveti thaj aver. Kana isi šukar kooperacija e dadeja dijaja, but polokhe šaj čhinavelpe o ikljovibe e sikljovnesko, thaj polokhe si te intervenisinelpe.
O phandanipe panda anela te informirinenpe taro sadivengoro aviba andi škola, ja te vakeripe lenge taro sukcesi lengere čhavesko andi škola ja i relacija maškar o amala. O phandanipe e dadengo dijengo nane lokho, tej si olegoro čhavoro ando pharipe te ikljol tari škola. I komunikacija maškar lende ovela phari odoleja so na mangen te keren lafi thaj cidenape. Numa tej i škola sila lačhi komunikacija thaj haljovibe maškar peste thaj sa si ko than hem djala palo plani, ando odova momenti te alo dji ko dijek problemi, but polokhe thaj pošukar ka ogorkerenpe o problemija. Jek tare lačhe meres te pandinepe o dada dijae školaja, si te organizuinenpe avrijalutneklasakere aktivitetija, kola šaj te ovel len sportikano, kulturikano, sikavdikano numa humanitarikano karakteri. O aviba e dadengoro dijengoro, ando esavke aktivitetija mothavela e sikljovnenge kaj olengere kherutne ando sikljovibe dikhen inportantno buti, thaj andi škola trubul te djalpe sakova dive.
Jek taro šukar egzamplija maškar o dada dija, kolengere čhavore si ando pharipe te ikljon tari škola si kana maškar lende kerelape ramomo „kontrakto“. Akava si jek taro kontraktija kote ola isilen pere obligacije te keren te na avel dji ko ikljovibe e sikljovnesko. Akava dokumenti nanele nisavo legalnikano šaipe, numaj ando leste si šukar haljovdi forma e situacijaki, kote i škola thaj o dad i daj trubul te keren.I obligacija so ljelje upral peste te keren, anela dji ko realizuibe o ramomo. Angleder te ramonelpe o „kontrakti“, trubul lačhe te haljovenpe sar te arakhen jekhutno lafi. Delape propozi so maškar lende trubul te oven o ekspertija andi piri buti soj andi škola (sikavno numa klasosko sikavno) thaj o dad i daj hem o ekspertija (pedagogo, psihologo, advokati…)
O drom e phandavimasko e amalengo tari škola. E amalengo zoraribe e sikljovnenge soj ando pharipe te ikljon tari škola si but inportantno. Ando nesave škole ko projektija dikhljape kaj ko okola sikljovne, so sine ando pharipe te ikljon tari škola,ulje majšukar amalikane edukatorija thaj mentorija, kola dindje zoraribe avere sikljovnege. Esavko egzamplo taro sikljovno so ka ikljol sinetari škola, avdije siandi pozicija kova dela ažutipe averenge, mothavela kaj ando esavke egzamlija barjarena poro autoriteti, thaj ovena pendjardehem akceptirime tari škola. Esavko zoraribe anela te tiknjarelpe i diskriminacija, sar maškaro sikljovne adjahar hem maškar o sikavne hem o sikljovne. O phandavipe e amalikane intervencijengo but droma andja hem polačhe rezultatije e sikljovnese andi škola. Nesave rezultatija mothavdje,tej dindjape pobaro „šajipe“ e sikljovnenge, odova anela polačho butikeribe e školake, a o sikavne ovenanaisarde. Vakeripe kaj si o sikljovne but responsibilna, silen bari motivacija te keren diso nevo, ja polačhe andi škola. Odoleske o šerunipe na trubul te igaren numa o sikavne. Kana e sikljovnenge vakeripe kaj šaj te oven partnerija pere sikavnencar, ona lena i rola čačutne thaj adjahar hem kerena i buti.
Andi škola isi sikljovnengoro organizuibe, kolesko anav akhardjola, sikljovnengo parlamenti.Ov kerela buti ando avrijalutne sikljovibaskere aktivitetija. Ola šaj te organizuinen thaj silen baro kapaciteti thaj te keren bare aktivitetija, numaj e sikljovnengere parlamentese trubul khaj drom te mothavelpe, te delpe godipe, taro kompetentna manuša soj andi škola, ja te vakera o sikavne. O sikavne trubul te arakhen modaliteti so e sikljovnengere aktivitetije te na nakhen „bidikhimo“, ja te ačhol sar birealizuimie sar ideja. Isi propozi kaj ande e školako Timi vaš te čhinavelpe e sikljovnengo ikljovibe, te arakhelpe persona so ka del phikaribe e sikljovnengere parlamentese vaš te realizuinenpe e sikljovnengere ideje thaj o propozija. Andi škola isi panda jekh grupa e sikljovnengi, kola keren sar timi, te den phikaribe avere sikljovnenge. Akava timi šaj kerel pere aktivitetija ando phandipe e sikljovnikane parlamentareja, numaj šaj hem ulavde kote godinena kaj o sikljovne dena phikaribe e sikljovnenge.
Po dijek drom si polokhe o sikljovne maškar peste te haljovenpe thaj te keren o kontaktija ja komunikacija. Ko akija biti vaš lengiri komunukacija numaj phikaribe, na trubula lenge o sikavno kova ke mothavel o drom ja diso aver. O numero e timosko taro sikljovne šaj te oven sa o sikljovne tari škola, taro okola so mangen te den phikaribe pere amalenge. Akava timi sar amalikano zoraribe andi škola astadja o trito than, palo e klasosko sikavno thaj o ekspertija andi škola. O butikeribe andi škola mothavi kaj andi škola panda isi diskriminacija, odoleja so hem amen korkore na sijam godjale so amen korkore keraja diskriminacija,adjahar so kana kerelape evaluacija dijekhe bučaki tu peraveja okole avere kote avela dji ko diskriminiribe. Odolese delape propozi e školake te organizuinel aktivitetija, hem but avera kedina kote si i resin te čhinavelpe i diskriminacija. Kana ka čhinavelpe numa te vakera te tiknjol i diskriminacija, sarine andi škola ka haljovenpe barabar jekh jekheja. Adjahar so andi škola ka haljovenpe sare pherde vogeja, hem okola so anglje haljiljepe sar diskriminnirime.
