O medije ljelje sa pobuter te oven, thaj akana silen neve karakteristike, numa ačhilolen hem purano. Šaj te vakeripe kaj andje but nevipe, kreativikanipe, thaj diso so andja lačhipe. O tipija e mas medijoskere barile but sigate, ko jekhutno vakti e tehnologijaja, te vakera sar soj o printiribe, filmija, radijo, televizija sa dji ko avibe e internetesoro sar nevo medije.
Žurnali
Avdije ko but baro numero kerelape buti e interneteja, o modeli e mičkime medijoskoro si po popularno ko phure manuša. O mičkime medij si žurnali, numa othe perena hem e pustika thaj edukacijako žurnali. Lengiri šeruni buti si te vakeren ple drabarutnenge kotar odova so ulo andi olengiri phuv thaj avrijal latar. Ola pana kerena so pošukar te haljonpe disave buča so nakhlje, thaj mičkinena disave godjalipa ja komentarija.
Olengori trito buti si o khelavipe – fotosija, pikture thaj aver mothavibe. E karakteristika žurnalesere medijoskiri, si sigate te sikaven odova so ulo, thaj so po lačhe te mothaven o informacije, kote dikhona o fotosija ando range. O mičkime medije te vakera sar soj ando tabloideskoro karakteri, mothavela hovavno glamuri, kova kerel bilačhipe ko manuša, kolendar astarel e čhavorenthaje adolescenten.
Radio
Palo ikljoviba o žurnali, ikljilo o medij, kola o informacije dena verbalikane. Vakeripe kotar radijo, kote šaj te šune. O radio kerala lačhipe e manušenge kola na djanen te drabaren, o vakerdo lafi sile šajdipe o informacije te oven haljovde hem okole manušenge so na djanen te hramonen thaj drabaren, so akaleja djelope angle jek phirdo ando manušipe. Avdije godinipe kaj o radio but hari šunelape, numa o radio isile pana pere šunavalen. Ko milja manuša isi so šunena o radio programi, kova emituinipe interneteja, numa šaj te vakera kaj o radio avdije majbut šunelape kana tradelpe vordon, kote si but frekfencije.
Televizija
I televizija geli but sigate anglal, ano amaro djivdipe. O optimistija vakerdje olake, kaj si opijum e manušenge soske uli majbaro konkurenti savorenge ando avrutni komunikacija. Ando piro magično zoralipe thaj vizuelno prezentuibe, mothavela but kulturakoro butikeribe, ja diso so na pendjaraja, E manušese si šukar sose bešindo dikhela thaj si leskešukar. Dikhela direktno programi, sa akava vakerela kaj si dominantno ko avdisutno them.
O popurane generacije djanen o periodi kana o programija sinelen piri vrjama butikeribasiri, thaj andi televizija naštine te dikhelpe diso sar soj avdije. Avdisutne generacije silen šaipe te dikhen but pobuter kanalija numa so sine angleder. Akana ki televizija šaj te dikhen vaver programija, kote silen informacijako thaj edukacijako karakteri, a isi hem khelutno programi, animirutno programi, thaj sa akava dikhela bari masa andar i rig e manušengiri.
Sa akava soj vakerdo isile baro benifit, numa i televizija sila hem bilačhe buča. Te vakera kaj o muklipe e vakeribasoro so isila i televizija, thaj aver medije anela dji ko bilačho karakteri, soske djanaja kaj o medije dikhen but čhavore thaj adolescentija.
Andi televizija mothavipe: informativno programi kote isi vakeribe kotar mudaripe, čoribeja aver bilačhipe. Pana sar bilačho šaj te dikhenpe hem pornografijakere filmija, kola silen bilačhi influenca upral o terne. Avdisutne čhavore barjona hem ko rijaliti programija, kola silen pozitivikani rig, numabut manuša na gndinena ko akava, numa vakeren samo i negativikani rig. I pozitivikani rig si, so šaj te dikhelpe but profilija kotar manuša, kote šaj te analizirina e manušen thaj te na kera esavke buča.
E medije silen edukativikani rola, hem odoleske trebela te djana kola programija kamelape te dikha ki televizija. I televizija dikhen baro numero čhavore thaj adolescentija, kote dikhena animirime filmija, kola dičhona kaj nane bilačhipe, numa othe isi but droma maripe ando scene. Sa akava ponoduri anela, dji ko iriba i psihikani thaj i seksualnikani rig ko terne.
Film
O filmi mothavel jek artikani buti, kote dikhaja o kreativipe jekhe personakoro. Kana kerelape lafi kotar filmija, kola si popularna maškar o terne thaj phure, isi hem dokumentarna filmija, kote šunaja o vakeribe e naratoresorothaj e kompetentno manušengoro ki tema soj mothavdi ando filmi. Ando filmesiri industija iklile baro numero artistijathaj kultno lačhe filmija.
Ando themesiri scena si pendjardi i Merlin Monro, Džejms Din, Ava Gardner, Marlon Brando, Al Paćino, Robert de Niro, numa ko amaro than si i Milena Dravić, Dragan Nikolić, Bata Živoinović, Ružica Sokić, Nada Arnerić, Radmila Savićević, Nikola Simić, hem aver. Isi generacije thaj generacije neve artistija, scenaristija, režiserija, kote palo pesteačhavdje piri buti , a o filmi andja o nevipe.
I jugoslovensko kinematografija angleder sinela but žanrije e filmengere: tari komedija sar soj „Tesna koža“, „Lude godine“, „Nije lako sa muškarcima“, „Otac na odredjeno vreme“, „Crnohumorne komedije“, „Sabirni centar“, ja te vakera kotar trilerija sar soj: „Variola Vera“, o horor filmi: “Leptirica“, kote palo akava i kinematografija geli anglal thaj ko 21. zamani kerdja nesave filmija kola si čače lačhe, kote isilen poro propozi, sar soj o filmi „Lavirint“, kova vakeri kotar e problemija e sektengoro, thaj olengoro butikeribe. Andoneve kinomatografije o filmi hem o serije kote isi kriminaliteti sar o filmi „Ubice moga oca“, andje poro popularnibe thaj but love okolenge so kerdje o filmi, numa sar bilačhipeo terne khuven andi rola e artistosiri, so šaj anel dji ko delikventno mothavibe ko terne.
Internet
O medij kova alo dji ko revolucionarno nevipe ki avdisutni vrjama, kova astari ja phandela sa o medije odova si o Internet. Kana alo maškar o manuša, o Internet astardja baro numero e manušengoro, numa avdije sile muklipe savorenge ko amaro djivdipe. O internet si amalikano medij,sar online žurnali, web sajtija thaj sar aver popularna blogija, forumija thaj avera sajtija sar soj majpendjardi i Wikipedija.
Akala medije mothaven kotar tehnologija, amalikani integracija thaj konstrukcija phandli kotar lafija, pikture, videija thaj šundipe. Olengoro jekhipe ando amalikane netvorkija si o phadlipe e manušengoro, olengoro godipnasko ulavibe kotar vakerdi tema, so šaj vakera kaj ulavela len kotar tradicionalnikano medij. Akava astarela e ternen ćhaven ando nevo medij, numa ko okova tradicionalnikano medij.
Ando Internet šaj te arakhas te phenas sa. Tari edukacija thaj aver šerune buča, dji okola so silen khelibaskiri resin, numa sa akava isile duj riga. Kotar jek rig sigate avelape dji ko informacije, numa i dujto rig si so savore šaj te aven dji ko butbilačhe buča, pa hem e čhavore kola sa pobuter lenape e interneteja, numa othe šaj te dikhen bilačhe buča sar maribe, mudarube thaj aver.
O amalikane netvorkija si kotor kotar internet, thaj o terne si ko pobaro numero sar dikhutne, numa isihem phure. Ko sa akava vakerdo bilačhe si pana, so ko manuša nane motivacija te sikljoven thaj te aven dji ko nesavo djandipe, numa rodindoj ko internet avena ko sa pere informacije.
